Unha viaxe pola galaxia LGBTIQA+
Eva Mejuto e Nee Barros · Ilustracións de Julia Lago
Un álbum de divulgación para explorar, da man dun alien moi curioso, a diversidade sexual e de xénero: das siglas LGBTIQA+ ás bandeiras, da natureza á historia de Galicia.
Sobre o libro
Sinopse
«A diversidade está en todas as partes. Só hai que aprender a vela!»
Que pasaría se un extraterrestre aterrase na Terra sen saber nada de nós? Eva e Nee embárcanse nunha viaxe espacial para explicarlle, desde cero e con moito humor, que é iso da diversidade. Cada planeta ten a súa cor, como a bandeira do arco da vella, e cada páxina achega unha peza nova: que significa cada letra das siglas LGBTIQA+, que simbolizan as bandeiras, que palabras usamos para falar de identidade, atracción e corpo, e como a natureza demostra que hai infinitas maneiras de ser.
O libro percorre tamén a historia, de Safo de Lesbos a Elisa e Marcela e de Stonewall ás conquistas máis recentes, presenta referentes LGBTIQA+ e convida a reflexionar sobre o acoso, a diversofobia e a empatía. Coas ilustracións cheas de cor de Julia Lago, é unha ferramenta para rapazada, familias e profesorado que queiran mirar o mundo con outros ollos.
Que atoparás dentro
- Que é iso da diversidade?
- Sopa de letras
- Os símbolos
- Algúns conceptos
- Diversidade e natureza
- Un pouco de historia
- A importancia de ter referentes
- Quen é ou que é normal?
- Datas que celebrar con orgullo
Follea o libro
Páxinas interiores
Ilustracións © Julia Lago, 2026 / Edicións Xerais. Reproducidas con permiso.
A tripulación
Autoría e ilustración
Na prensa
Falan de nós
Fixéronnos unha entrevista moi guai no Faro Educa, a ver que vos parece!
«A diversidade fai o mundo máis amplo para que caibamos todes»
- Título
- Universo diverso. Unha viaxe pola galaxia LGBTIQA+
- Texto
- Eva Mejuto e Nee Barros
- Ilustracións
- Julia Lago
- Editorial
- Edicións Xerais de Galicia
- Colección
- Álbum ilustrado · Divulgación e coñecemento
- 1.ª edición
- Setembro de 2026
- Formato
- 21 × 26 cm
- Páxinas
- 48
- Encadernación
- Cartoné
- ISBN
- 978-84-1110-855-3
- Idade recomendada
- De 9 a 99 anos (ou máis!)
- Lingua
- Galego
- PVP
- 15,50 €
Recursos · evamejuto.gal/universodiverso
Tamén recomendamos…
No libro prometemos que aquí estaría a biblioteca colorida que non nos cabía nas páxinas. Velaquí unha escolma de libros, filmes, cancións, pódcasts e canles para seguir explorando o universo diverso, ordenada por idades.
Chegaches desde o código QR do libro? Estás no sitio axeitado!
Con Tango son tres
Justin Richardson e Peter Parnell
Ocurreu no zoo de Central Park, en Nova York. Tango foi a primeira pingüín que tivo dous pais. Unha familia diferente que nada, salta, xoga no estanque e que é feliz.
A historia dos bonobos con lentes
Adela Turín
Bonobas e bonobos vivían xuntes na fraga, mais eles tiñan privilexios dos cales elas carecían: comían, viaxaban e modernizábanse, mentres elas recolectaban comida e criaban a prole. Até que as bonobas cansaron…
Eduardo Blanco Amor
Éric Dopazo e Bea Gregores
Conta a historia de Eduardo Blanco Amor, un escritor galego que pasou a vida escribindo e viaxando, sempre cunha cámara na man ou unha historia na cabeza. Atreveuse a ser el mesmo nunha época en que pouca xente o facía.
Elisa e Marcela
Eva Mejuto e Bea Gregores
Elisa e Marcela foron dúas mulleres galegas que, a principios do século XX, protagonizaron un feito histórico: casaren. Elisa adoptou a identidade do seu curmán falecido Mario para casar coa súa amada Marcela, nunha época en que o amor entre persoas do mesmo xénero estaba prohibido.
Mamá, quero ser Ziggy Stardust
Iria Misa
Aine ten 9 anos, está de vacacións e descubre un músico con roupa que non parece de home nin de muller. Unha estrela de rock que muda de aspecto como os camaleóns. Decide que, cando medre, tamén será un músico marciano que poida ser o que lle pete.
O mapa da túa sexualidade
Laura Veiga
Sabías que a túa sexualidade é como un mapa que se vai debuxando a medida que medras? Un mapa cheo de camiños, preguntas, emocións e descubrimentos que te axudan a entender quen es e como te relacionas co mundo. Neste libro atoparás unha guía clara, divertida e coidada para comprender como funcionas por dentro e por fóra: o corpo que medra, os sentimentos que ás veces enredan, o xénero, o desexo, a orientación sexual... e moito máis!
Nimona
Nick Bruno e Troy Quane
Unha rapaza metamorfa xúntase cun cabaleiro acusado inxustamente nunha aventura. Xuntes, desafían un reino cheo de prexuízos con acción, humor e rebeldía.
Identidade
Nee Barros
Zé é un adolescente trans que decide saír do armario. Moita xente da súa contorna non entende o que son as identidades trans, e el terá que percorrer un camiño na escola, coa familia e coas amizades para reivindicar a súa realidade.
Fóra do normal
María Reimóndez
André, igual que os superheroes, vive en conflito coa súa identidade. Encontra nas súas amizades unha "Patrulla Trans" que lle amosa que a verdadeira heroicidade é resistir sendo unhe mesme.
Heartstopper
Alice Oseman
O Charlie e o Nick están no mesmo instituto, mais nunca se coñeceron... até o día en que teñen que sentar xuntos. Axiña se fan amigos, e o Charlie comeza a namorar do Nick, aínda que pensa que non ten ningunha oportunidade.
22 segundos
Eva Mejuto
Álex é un mozo trans que grava un vídeo para compartir a súa realidade. Mentres o arquivo de 22 segundos se sobe á rede, repasa en primeira persoa anacos da súa infancia e adolescencia.
Furia
María Reimóndez
Despois da morte da súa nai, Cecilia, unha adolescente de 16 anos, non sabe como convivir coa dor. Por se non fose pouco, unha pandemia, un cambio de casa, a precariedade e a incomunicación coa súa tía-avoa énchena de rabia ante o mundo que a rodea. Cando a cousa parece que xa non podería empeorar máis, aparece o boxeo.
DX
Eli Ríos
Andre e Morgan traballan en DX, unha empresa punteira en biotecnoloxía na Coruña. Na noitevella de 2029 entablan unha relación xusto antes de que estale unha epidemia de ton apocalíptico.
Campo de plumas. Poemas LGBT+ para a mocidade dende a Antigüidade ata hoxe
Jesús Castro Yáñez (escolma e tradución) / VV.AA.
Antoloxía poética que reúne versos de temática LGBTIQA+ de diversas épocas e culturas. Fai un percorrido pola historia da poesía universal para amosar como a diversidade sempre estivo presente.
Neeumatiko
Canal de YouTube
Canal que explica conceptos básicos sobre xénero e a realidade das persoas trans e non binarias. Mestura recomendacións literarias, análises de obras e activismo LGBTIQA+, cunha clara intención divulgativa e educativa.
Loveless
Alice Oseman
Georgia ten 18 anos e nunca namorou, nunca bicou a ninguén, nunca sentiu un frechazo. Como persoa obsesionada cos fanfics, sempre estivo segura de que un día encontraría a persoa axeitada. Mais ao comezar a universidade, decátase de que o amor non é só o romántico e cuestiona a súa orientación.
Triloxía dos seres completos (Cobiza, Multitudes, Retorno)
María Reimóndez
Triloxía de ciencia ficción feminista ambientada nun futuro despois da Gran Desconexión, un cataclismo que transformou o mundo coñecido. As protagonistas son seres completos, criaturas de materia vexetal con forma humana, que loitan por sobrevivir nun mundo que as clasifica, comodifica e explota. A triloxía aborda a construción do xénero, da racialización, a identidade, a orientación sexual e a relación entre humanes e natureza cunha ollada feminista e ecoloxista.
Nom estamos quebrades
Nee Barros
Despois de romper co seu mozo, Eva, estudante de Filoloxía, comeza a cuestionar a súa sexualidade, o seu xeito de se relacionar coes demais e sente a presión do entorno por encaixar. Coa axuda do seu mellor amigo Edu e doutras persoas que topa no camiño, comeza a entender o que lle está a acontecer.
REFERENTES: Memoria LGBTIQA+ Galega
Avante LGBT+ Pontevedra
Un pódcast que recupera a memoria das persoas LGBTIQA+ galegas que precederon as xeracións actuais na loita polos seus dereitos. A través de conversas en primeira persoa, o colectivo Avante LGBT+ de Pontevedra tece un relato diverso e colorido da memoria.
Alguén nos lembrará
VV.AA.
Antoloxía con quince relatos de quince persoas novas e diferentes arredor da disidencia de sexo e xénero. Quince voces de ata 30 anos que escriben co convencemento de que, como dixo Safo, "Alguén nos lembrará".
Trompeta
Jackie Kay
Ao falecer Joss Moody, célebre trompetista de jazz, desvélase un aspecto da súa vida que permanecera alleo á ollada pública. Mentres a súa viúva Millicent se refuxia na aldea escocesa de Torr, o fillo Colman acolle o achado con irado desconcerto. Estas e outras personaxes completarán o relato dun tipo cunha vida xenuína, que grazas ao amor puido transcender os convencionalismos e rebelarse contra a visión monolítica das relacións humanas.
Fodemos? De que (non) falamos cando falamos de sexo - sexualidades
Bel Olid
Un ensaio sobre as relacións sexuais e os prexuízos que levan asociados. Seguir o desexo, compartir o pracer... parece doado, mais vivimos sexualidades condicionadas por expectativas, suposicións e tabús.
A defunción dos sexos
Daniela Ferrández
Ensaio divulgativo que recupera a memoria das disidentes sexuais na Galiza contemporánea. A través de fontes de arquivo e xornalísticas, a autora reconstrúe os itinerarios vitais de persoas que, desde finais do século XIX, viviron á marxe da norma sexual imperante e se enfrontaron ao xugo dunha sexualidade obrigatoria que as condenaba ás marxes e ao ostracismo.
Guia de linguagem não binária
Daniel Amarelo, Nee Barros e Alva Lourenço
Unha guía práctica sobre o funcionamento da linguaxe non binaria. Explica conceptos básicos, a historia e as orixes da proposta, e ofrece exemplos de uso e exercicios útiles tanto para a norma reintegracionista como para a ILG-RAG.
Eduardita
Piratas sen parche
Canción-himno que reivindica a figura de Eduardo Blanco Amor e lle dá a volta aos insultos que lle berraban polas rúas de Ourense. "Envexosos vós, que eu levo o amor no nome, non sabedes o que é", canta a banda.
As guías de Queeruña
Clube de lectura Queeruña (A Coruña)
Na Coruña existe un clube de lectura chamado Queeruña. Todos os anos publican guías con recomendacións de materiais LGBTIQA+. Nelas podes descubrir moitos outros filmes, novelas, cómics, poesía… ordenados por idades e dispoñibles nas bibliotecas públicas. Nesas guías tamén hai información e recursos para a túa familia e profesorado.
Rede Educativa de Apoio LGBTIQ+ de Galicia
Rede de docentes
Unha rede de docentes que traballan para levar a diversidade ás aulas, cunha chea de iniciativas e recursos na súa páxina web. É un luxo ter profes así no país!
Estamos aínda traballando nesta biblioteca colorida, seguiremos actualizando e engadindo recursos.